Монгол зураг-19

Түрүүчийн бүлэгийг доорхи линк дээр дарж уншина уу!  https://gantulga.wordpress.com/2018/06/10/%D0%BC%D0%BE%D0%BD%D0%B3%D0%BE%D0%BB-%D0%B7%D1%83%D1%80%D0%B0%D0%B3-18/

Галаа урвахаар шийджээ. Тэр өөрийн компаниа, босс Полоо хулхидахаар шийдэв. Уг нь түүний хамгийн дургүй зан авир бол хүний итгэл эвдэх. Гэвч энэ удаа тэр үүнийг багын найз Мөөгий, бусад Монголчуудын хувь заяаны төлөө, мөн мэдээж өөрийнхөө амь насны аюулгүй байдлын төлөө хийжээ. Компанийхаа бодлого, нууц, төлөвлөгөө сэлтийг Адам, Кент хоёрт худалдсанаар аюулгүй байдлыг олж авна гэж үзжээ. Давахгүй гэсэн даваагаар гурав давдаг гэж юутай үнэн бэ? Амьдрал гэж агуу баялаг, хүний санаанд орохгүй зүйл ч гэж алга. Мөнгө гэдэг ч юутай хүчтэй аж. Заримдаа хүний амь насыг ч мөнгөөр үнэлж, эрх мэдэл бас мөрөөдлийг ч худалдаж авч болдгоороо мөнгөний ид шид оршиж, мөнгөний төлөө хүмүүс үхэлдэн тэмцэлддэг ажгуу. Гэвч мөнгөөр худалдаж авч болохгүй зүйл байдгийг Галаа бас мэднэ. Чухамдаа хүний ёс суртахууны хэмжүүр мөнгө юм биш үү? Мөнгөөр бүхнийг үнэлж худалдаж авч болно гэж үздэг хүмүүс ёс суртахуунгүй, мөнгөнөөс үнэ цэнэтэй зүйл байдаг гэж үздэг нь ёс суртахуунтай гээд ёс суртахууны үнэлэмж хэм хэмжээг хялбаршуулан ойлгож болох уу?

  Үргэлжлүүлэн унших

Advertisements

Монгол зураг-18

Бүлэг-17 доорхи линк дээр дарж уншина уу!
https://gantulga.wordpress.com/2010/09/27/%D0%BC%D0%BE%D0%BD%D0%B3%D0%BE%D0%BB-%D0%B7%D1%83%D1%80%D0%B0%D0%B3-17/

Одоо тэр өөрийн эрхгүй багын найз Мөөгий болон өөрийнхөө төлөө бурханыг гуйж залбиран эсэн мэнд энэ асуудлаас гаргаж өгч туслаач гэж байлаа. Бурхан гэдэг агуу аж. Хүн гэдэг сонин аж. Нэг хэсэг л бурхан тэнгэр байдаг ч юм уу, үгүй ч юм уу хэмээн бардамхан бодож, бас нэг үе сэтгэлээр унан, амьдрал утгагүй санагдан амиа хорлодог ч юм уу? гэх мэтээр элдэв бодолд автагдаж явсан хүн одоо утсан чинээ улаан аминдаа хоргoдон юунаас ч эрхэм хэмээн амь насандаа санаа зовж явах. Хүн өөртөө итгэх итгэлээ алдаж, сэтгэл санааны дарамтанд орж, хүчин мөхөсдөх ядруу үедээ л бурханд хандан гуйж мөргөдөг юм уу? Бүх юм өөрөөс нь хамаарахааргүй болсон тэр л үед, сүүлчийн итгэл найдвар тулах цэгээ болгон бурханд ханддагт л бурхан, тэнгэр, год гэхчлэн өөр өөрөөр нэрлэгддэг тэр далдын агуу их зүйлийн сүр хүч нь оршдог юм уу? Хүнд ирээдүйдээ итгэх итгэл, найдвар идэх уухаас илүү хэрэгтэй байх үе байна. Хэрвээ тийм итгэлгүй бол хоол, унд байсан ч хоолойгоор давахгүй, давлаа ч хоолшихгүй байсаар сэтгэл санаагаар үхдэг гэдэг. Гэтэл итгэл найдвараа гээхгүй явсаар хоолгүй, усгүй болсон ч тэсч гарсан түүх хүний түүхэнд бишгүй олон. Хүмүүст хүнд цагт нь тулах эцсийн тулгуур цэг, итгэл найдвар өгдөгөөрөө бурханы ач холбогдол, сайн сайхан нь оршдог.
Үргэлжлүүлэн унших

Хойд америк дахь Монгол ул мөр

Европчуудын манлайлал буй болохоос өмнө Ази тив тэр тусмаа Хятад гүрэн эдийн, засаг технологиор давамгайлж байсныг орчин үеийн ихэнхи түүхчид хүлээн зөвшөөрч эхэлсэн. Тэр үед Хятадууд далайн тээвэр, аялалаар ч бас л тэргүүлж байв.

Хятадын Мин гүрний флотыг алдарт адмирал Зэнхэ (Zheng He) удирдаж олон зуун жил давтагдаагүй цар хүрээтэйгээр тив дэлхийг нээх аялалыг хийн шинэ газар нутаг, тивүүдийг Европчуудаас түрүүлэн нээж байсныг одоо дэлхийн түүхчид хүлээн зөвшөөрдөг.


1420-оод оны Европууд нээхээс өмнө Хятадуудын хийсэн газрын зураг

Энэ тухай яагаад дурдах гэсэн бэ? гэхээр миний бичиж буй үйл явдалтай холбоотой учраас дурдахаас аргагүй бөгөөд гэхдээ би энэ давамгайллыг тайлбарлаж таниулах гээгүй харин Монголчуудын Америк тивд Европчуудаас өмнө очсон байж болох баримтуудыг дурдах гэсэн юм.

Монголчууд түүхэндээ их нүүдэл, цагаачлалыг олон удаа хийсэн ард түмэн. Улс түмнүүдийн их нүүдэл гэж түүхэнд тэмдэглэгдсэн их нүүдэл ч Монголоос улбаатай гэж үздэг. Энэхүү их нүүдэл нь олонхи эрдэмтэдийн үздэгээр Монголоос дайжсан Хүн гүрнийхэн замд нь таарсан ард түмнүүдийг шахан түрсээр эртний Герман аймгуудыг Ромын эзэнт гүрэн рүү шахан оруулж орчин үеийн Европийн ард түмнүүдийг бүрэлдэн бий болгоход ихэхээн нөлөө үзүүлсэн билээ.

Энэ мэтээр Монголчуудын өвөг дээдсийн их нүүдэл, цагаачлалыг тоочоод барахгүй учраас Америк тивд очсон түүхийг онцолж бичие. Энэ түүх нь саяхан 90-д оноос эхэлсэн Монголчуудын эдийн засгийн цагаачлалтай ямарч холбоогүй. Мөн хуучин Зөвлөлт гүрний дараа бий болсон шинээр тусгаар болсон улсуудын агуу эртний түүхтэй болох гэсэн дөвчигнөл, элдэв онигоо шиг түүх бичлэгтэй холбож андуурахгүй байгаасаа гэж хүснэм.

Монголчуудын хувьд Америк тивд очсон хамгийн сонирхолтой баримтууд:

Үүнийг бичигч би бээр түүхэн баримтуудыг бичгийн, эд зүйлсийн, орчин үед генийн буюу ДНК-гаар гэсэн гурван аргаар тогтоосон бол хамгийн зөв сайн нотолгоо гэж үздэг тул нотолгоогоо гурав хуваая.

1. Түүхэн бичгийн баримт
a) Испанийн ханхүү Карлос гэгч Испанийн байлдан дагуулагч Педро Менендез де Авилис Адилентогийн намтарыг бичихдээ:
“Хятадууд … Татарууд, Япон, Солонгосуудтай хамт далай гатлан одоогийн Мексик, Перу, Панам зэрэг улс орнуудыг хамарч байсан Куивирагийн хаант улсад очиж байсан” хэмээн тэмдэглэсэн байна.
Педро гэгч нь хэн бэ? гэхээр Америк тивийг эзлэн түрэмгийлсэн анхны Европчуудын нэг бөгөөд Испанийн эзэнт улсад 1580 оны үед Флоридаг нэгтгэсэн хүн юм.
b) Gavin Menzies-ийн 2003 онд хэвлүүлсэн “1421: The Year China Discovered America” номын 563 -р хуудсанд “Ranking – Staenburg 325” гэж иш татсанаар Америк тивд анх очсон Испанчууд Монгол бичигтэй цаас олсон гэжээ.

2. Эд зүйлсийн баримт
a) Маягийн сүмийн хананд Хятад, Монгол бичгүүд Маягийн дүрс бичигтэй хамт байсан гэж Дээр дурдсан номын 562-р хуудсанд R.Wertz гэж хүний мэдээллээр бичсэн байна.

3. Генийн буюу ДНК нотолгоо
a) 2002 онд Марианна Фернандезе-Кобо болон бусад эрдэмтдийн вирус судлалын талаар American Journal of Physical Anthropology 118-ийн 154-168 хуудаснуудад хэвлүүлсэн дүгнэлтээр бол орчин үеийн Монгол болон Япон хүмүүстэй хойд Америкийн Салиш, Навахо өмнөд Америкийн Гуарани хүмүүс нэг өвөг дээдэстэй байна гэж үзжээ.

Эндээс уншигч та бүхэнд Мин гүрний Хятадын флотын бүрэлдэхүүнд Монгол хүмүүс яаж оролцсон байх вэ? гэсэн асуулт гарч ирэх нь дамжиггүй.

Тайлбар:

Монголын Их Юан гүрэн далайн аялалыг хөгжүүлж Япон, Индонез, Камбож, Вьетнамд хөлөг онгоцуудаар тэнгисийн явган цэрэг болон морин цэргийн десант буулгаж байсан түүхтэй. Энэ нь дараа үеийн Хятадын Мин гүрэнд нөлөөлж байсан нь ойлгомжтой.

Хятадын Сүн гүрнийг бүслэн мөхөөх стратегийн дагуу одоогийн өмнөд Хятад дахь Нанжао хэмээх улсыг Сүбээдэй баатрын хүү Урианхадай дагуулжээ. Ингээд Монгол гүрэн эзэлж авсан газраа олон тооны Монгол, Хятан, Төв азийн иргэдийг сууришуулан, түшэц газраа болгосон нь өнөөгийн Хятадын Юанан мужийн Монголчуудын дээдэс болсон юм.

Их Юаныг мөхөөж шинээр мандсан Мин гүрэн Юанан мужид суурьшсан Монголчуудыг буулган авах гэж нилээн цаг хугацаа, хүч зарсан. 1388 онд л Бээжинг эзэлснээс хойш 12 жилийн дараа өмнөд Хятад дахь Монголчуудын эсэргүүцлийг нугалж чаджээ. Уг мужийг эзэлж авсан Мин гүрний цэргүүд нас бие гүйцсэн Монголчуудыг хоморголон устган, охид, хөвгүүдийг нь боолчилсон байна. Олзлогдсон нэг түмэн Монгол хөвгүүдийг засаж тайган болгоход нилээд нь шархаа даалгүй нүд аниж, үлдсэн нь зарц, боол болон тараагджээ.

Энэ байлдаанд идэвхитэй оролцсон Мин улсын ханхүү Зу Ди-д хувиарлагдсан олзлогдсон Монгол хөвгүүдийн дунд хятадаар Зэнхэ(Zheng He) хэмээн нэрлэгдэх болсон хүү байсан байна. Хожим Зу Ди Юнлэ/Ёнлэ хэмээн өргөмжлөгдөн 1402-1424 онд хаанчилахад ойр дотны итгэлт хүний хувьд Зэн Хэ онцгой зүтгэн дээр дурдсан алдарт адмирал болсон.

Юнлэ хаан ч өөрөө Монголчуудтай их сонин холбогддог. Түүний эхийг Юан гүрний сүүлчийн хаан Тогоонтөмөрийн хатан Хонгирад бүсгүй байсан гэж Монголын Алтан товч зэрэг олон сурвалж бичгүүдэд дурддаг. Эдгээр сурвалжуудад эх нь Хятадын хаанд нэг сартай жирэмсэн олзлогдсон хэмээн Юнлэг Монгол хааны үр гэжээ. Хятадын зарим эрдэмтэд сүүлийн үед энэ асуудлыг няцаахаа болиод эх нь Монголын хааны татвар эм байсан нь үнэн боловч Солонгос хүн байсан эсвэл Монгол хүн байсан гэдэг. (https://prabook.com/web/yongle.emperor/1344261 болон The Taiping Rebellion, M.E. Sharpe , 661хуудас)

Ямар ч байсан Мин гүрнийг үндэслэгч эзэн хаан Хон Ву ханхүү Юнлэг Монгол хааны үр байж магадгүй хэмээн сэжиглэж тэр үеийн Хятадын нийслэл Нанжингээс зайдуу Бээжинд суулгаж, улмаар хаан ширээгээ ач хүү Зу Юнвенд залгамжлуулсан. Энэхүү ач дүү нь Юнлэг алуулах тусгай хүчнийхнийг явуулж байсан нь Мин гүрний түүхэнд ямар ч маргаангүй баримттай болсон тохиолдол юм. (48 -р хуудас. Gavin Menzies 1421: The Year China Discovered America. 2003)

Ингээд Юнлэ бослого гарган Монголын Үжээд, Урианхай аймгуудаас цэргийн тусламж аван хаан ширээг булаан авчээ. Сонирхолтой нь Юнлэ нь өөрийгөө Монголтой хамаагүй, цэвэр цусны Хятад хаан гэдгээ нотлох гэсэн мэт Монголын эсрэг маш түрэмгий бодлого явуулж 5 удаагийн аян дайн хийн өөрийн биеэр удирдаж байсан нь Хятадын түүхэнд гарч байгаагүй тохиолдол бөлгөө.

Энэ бүхнээс үндэслээд Юнлэг хаан болоход тайганууд хүчин зүтгэсэн бол түүний өрсөлдөгч хаан ширээг залгамжлагч Зу Юнвенг Монголын Юан гүрний үед ихэд дорд үзэгдэж байсан Хятад мандарин түшмэдүүд дэмжиж байсан нь харагддаг. Шинээр мандсан Юнлэ хааны итгэлийг олж үнэнч зүтгэсэн тайганууд бол голдуу Зэн Хэ тэргүүтэй хөвгүүн байхдаа олзлогдон тайган болсон Монгол гаралтай хүмүүс байсан. Дашрамд дурдахад энэ Мин гүрний үеэс тайганууд Хятадын төрд онцгой байр суурь эзлэн, дээд албууд хашдаг болсон юм.

Мөн Юнлэд хаан болоход тусалсан дээрхи Монгол аймгууд онцгой шан шагнал аван Хятадын албанд зүтгэх болсон.

Хятадын Мин гүрэн гадаад харилцаандаа Хятад, Монгол хос бичгээр бичсэн захиа явуулж баруун зүгийн улс орнуудтай харьцаж байсан нь түүхэн баримттай юм.
Иймээс Хятадын флотын бүрэлдэхүүнд Монгол дарга, цэрэг, албан хаагчид оролцон Америк болон дэлхний бусад хэсэгт хүрч байсанд гайхах зүйлгүй билээ.

Ё.Гантулга
2018 оны 6 дугаар сар 3
Австрали

Австралид Монголын шинэчлэгдсэн хууль тогтоомжийг танилцууллаа

Хөгжлийн төлөө Монгол-Австралийн Нөхөд” ТББ (MAP4D) нь 2014 оны 6 сарын 16-ны өдөр Брисбэн хотод байгуулагдсан. Тус байгууллагын үндсэн зорилго нь Монгол, Австралийн харилцаа, хамтын ажиллагааг дэмжин ажиллахад оршино. Үндсэн зорилгодоо хүрэхийн тулд Австрали Улсад сурч, ажиллаж, амьдарч байсан Монголчууд буюу Австрали Улсын элч нар, Монгол Улсад сурч, ажиллаж, амьдарч байсан Австраличууд буюу Монгол Улсын элч нарыг үйл ажиллагаандаа татан оролцуулж, хамтран ажиллахад чиглэж байна.

SONY DSC Үргэлжлүүлэн унших

“Монгол Зураг” номны тухайд

Энэхүү ном нь орчин цагт гадаадад амьдарч буй Монгол хүмүүсийн амьдралын тухай тууж юм. Зохиогч энэхүү номоо өвөрмөц стилээр сэтгэж бичсэн нь анхаарал татахуйц, мөн түүнчлэн энэ номноос уншигч гадаад дахь ялангуяа АНУ, Австрали /олон үндэстний өндөр хөгжилтэй орон/ дахь Азиуд, тэр дундаа Монголчууд нийгмийн дээд, доод, дунд шатанд хэрхэн амьдарч байгаа талаар мэдлэг, мэдээллийг олж авч болно.

Хэдийгээр уг зохиол нь уран зохиолын тууж гэсэн ч эндээс арьс өнгөний ялгаварлан гадуурхал, барууны нийгмийн хөгжлийн үндэс, доголдол, барууныхны амьдралын хэв маяг, хар тамхи, буудалцаан зэрэг холливудын кино, барууны сонин, сэтгүүлийн мэдээнд гардаг зүйлс нь Монгол орон, Монголчуудаас хол хөндий зүйл огтхон ч биш, Монголчууд аль хэдийн үүний нэг хэсэг болсон гэдгийг маш тодоор гаргаж өгчээ.

Номыг уншихад сонирхолтой, мэдээлэл, мэдлэг авахуйц болгоход зохиолчийн хувийн туршлага, мэдлэг шууд мэдрэгдэнэ. Туужийн гол дүр нь Галаа хэмээх гадаадад олон жил амьдарч буй залуу, түүний эргэн тойронд болж буй үйл явдлыг “нүдэнд харагдтал” бичсэн байгаа юм. Барууны капиталист нийгэмтэй нүүр тулаад ердөө 20-хон жил болж байгаа гэхэд Монголчууд барууны нийгмийн доодоос дээд хүртэл бүх түвшинд амьдарч, суралцаж, ажиллаж байгаа, эдгээр нь ямар ялгаатай орчин, соёл, сэтгэхүй, хүрээлэл байдгийг уншигчид хэлж өгч чадсан байна. Зохиолыг уншиж байхад зохиолч өөрийн амьдралын туршлага, мэргэжлийн онцлог мэдлэгээ ашигласан нь мэдрэгдэх бөгөөд түүний мэдлэгийн ерөнхий хүрээ нь нэлээд өргөн түвшинд байгаа нь мэдрэгдэнэ. Ялангуяа асуудлыг философи, түүхийн үүднээс шүүмжлэлтэйгээр мэдлэгтэй хүний өнцгөөс тайлбарлаж хэлсэн нь таалагдсан. Зохиолчийн өөрийн ертөнцийг үзэх үзэл уг номонд туссан талаар нэгэнтээ дурдсан байна.

Уг номын зохиолч Ёндонгийн Гантулга нь 2009 оны 8 сарын 7-оос 2011 оны 7 сарын 3-ны хооронд энэхүү номоо 27 бүлэг цуврал байдлаар бичиж өөрийн цахим хуудсандаа нийтэлсэн байна. Холливудын онц сонирхолтой кино үзэж буй мэт “одоо яах бол” гэсэн хариултыг бүлэг бүрт уншигч өөртөө тавих бөгөөд гараасаа салгахгүйгээр уншмаар санагдсан. Иймэрхүү “онцгой байх” шалтгааны нэг нь гол баатрууд Монгол хүмүүс бөгөөд “гадны” гэж боддог бүх зүйлс өнөөдөр үнэхээр Монголчуудын гэсэн асуудал болсныг тодоор харуулж өгсөн.

Ё.Гантулга бол мэргэжлийн зохиолч, яруу найрагч, эсхүл сэтгүүлч хүн биш, тэрээр мэдээллийн технологийн авъяастай инженер. Тийм учраас энэ номноос Монгол хэлний яруу тансаг хэллэг, уран зохиолын зөгнөлт төсөөлөл зэргийг хүлээх хэрэггүй. Зохиолч өөрөө энэхүү номонд гарсан зүйлийн 50% нь үнэн бодит зүйл гэж бодож болно гэж дурдсан байгаа юм. Угаас өнөө үед мэргэжлийн зохиолчдоос илүүтэй сонирхогчдын бичсэн зүйлс илүү прагматик, амьдралд ойр болсон шиг санагддаг. Зохиолчид магадгүй уран сайхны хэт өндөр түвшинд аваачдаг байх, харин сонирхож бичдэг хүмүүс бол яг өөртэйгээ адилхан сонирхогчдод илүү ойр дотно, ойлгомжтой, хэрэгтэй байж болохуйц хэмжээнд бичдэг боловуу гэсэн сэтгэгдлийг энэ ном өгнө. Гэхдээ уг номыг АНУ, Австрали зэрэг оронд удаан хугацаагаар амьдарч байгаагүй сэтгүүлч, эсхүл зохиолч хүнээр хянан тохиолдуулж найруулга хийлгэсэн бол Монголын мянга мянган уншигчдад илүүтэй хүрэх байсан байж болох.

Энэ номын шүүмжлэлтэй нэг тал нь Монгол хүний муу талуудад “хэт тааруулж” бичсэн явдал. Яагаад? Уг нь өнөөгийн Монгол хүний амьдралын хэв маяг, сэтгэлгээнд тааруулж бичихээс илүү түүнийг ямар байх ёстой хэмжээнд аваачиж бичсэн бол “гадаад дахь зөв соёл, сэтгэлгээ”-г Монгол руугаа чирэхэд хэрэгтэй байсан боловуу. Тухайлбал, Монголчууд гадаадад хүртэл зөвхөн хоорондоо өрсөлддөг /тамын тогооны үлгэр шиг/, архидалт Монгол цусанд нэвт шингэсэн, хуулийг ямар нэгэн аргаар дагахгүй байж болдог гэсэн ясны сэтгэлгээ зэрэгт тааруулж бичжээ. Гэтэл ийм явдал барууны нийгэмд яагаад байхгүй байгаа, ямар зүйл эдгээр асуудлыг багасгаж буйг гаргаж өгсөн бол ач тустай байх байжээ. Гэхдээ нэг номонд бүх зүйлийг багтааж болохгүй гэдгийг бас ойлгох ёстой.

Сүүлийн үед Монголчууд маш олон кино хийж байна. “Цэлмэг тэнгэр” гэх мэт киногоор гадаад дахь Монголчуудын амьдралыг гаргахыг хичээсэн байна. Миний бодлоор бол “Монгол Зураг” ном уран сайхны маш сайхан киноны зохиол болж чадна.

Өөрийн оюун ухаан, цаг хугацаагаа зарцуулан 2 жилийн туршид өнөөгийн Монголчуудад тун хэрэгтэй, тулгамдсан асуудлаар ном бичсэнд маш их баярлалаа. Таны амьдралд аз жаргал, ажилд тань амжилт хүсье!

Зохиолчийн цахим хуудас:https://gantulga.wordpress.com/

Твиттер хаяг: @GantulgaYo

Өндөр овогт Сэрээновын Мандахбат

2013 оны 8 сарын 14

Ekh survalj: http://mandakhbat.wordpress.com/2013/08/14/%d0%bc%d0%be%d0%bd%d0%b3%d0%be%d0%bb-%d0%b7%d1%83%d1%80%d0%b0%d0%b3-%d0%bd%d0%be%d0%bc%d0%bd%d1%8b-%d1%82%d1%83%d1%85%d0%b0%d0%b9%d0%b4/

ДАЯН ДЭЛХИЙД ТАРХАН СУУГАА НИЙТ МОНГОЛЧУУДДАА ТҮГЭЭХ УРИАЛГА

urilga_B

Гадаадад суугаа Монголчуудын төрийн эрхийг барилцах боломж,  сонгуульд саналаа өгөх эрхийн төлөө Цахим Өртөө Холбоо болон гадаад дахь бусад Монголчуудын холбоод, олон төрийн бус байгууллагууд, хувь хүмүүс  10 гаруй жил зүтгэж, хамтран ажилласны үр дүнд өнгөрсөн УИХ-ын сонгуульд гадаадад суугаа Монголчууд түүхэнд АНХ удаа саналаа өгсөн билээ.

Энэхүү эрхээ дахин баталгаажуулж, 6 сарын 26-д болох Монгол Улсын  Ерөнхийлөгчийн сонгуульд оролцох цаг хаяанд ирлээ. Алсад суугаа хэдий ч  эх нутгаа гэх сэтгэл, зориг дүүрэн байдаг Монгол Улсын иргэн Таны гарт  эх орны тань хувь заяа байна.

Иймээс, дэлхийн өнцөг булан бүрт суугаа Монгол Улсын иргэд та  бүхнийг 5 сарын 29-ныг дуустал явагдах сонгуулийн бүртгэлийн ажиллагаанд иргэний үүргээ ухамсарлан, идэвхитэйгээр бүртгүүлж, сонгуульд оролцохыг уриалж байна.

Монгол хүн таны гарт Монгол Улсынхаа ирээдүйг тодорхойлох эрх тань  байдаг. Эрхээ алдалгүй эдэлж, сонгуульдаа идэвхтэй оролцоцгооё!

Мөн энэхүү уриалгад нэгдэн орж, дэлхий даяар түгээхийг орон бүрийн  Монголчуудын холбоо, нийгэмлэг, Монголын бүх веб сүлжээ, мэдээллийн  сувгууд, эх орноо гэсэн бүх иргэддээ уриалж байна!

МОНГОЛ ТУУРГАТНЫ ЦАХИМ ӨРТӨӨ СҮЛЖЭЭ
ЦАХИМ ӨРТӨӨ ХОЛБОО

www.tsahimurtuu.mn

Нэмэлт мэдээллийг эндээс үзнэ үү:
БИД СОНГОХ ЭРХТЭЙ КЛУБ
https://www.facebook.com/electionMN

Австрали хөрөнгө оруулалтыг виза-ээрээ даллаж байна

Австрали 2012 оны 11 сараас эхлээд “класс 188” визаг нэвтрүүлж эхлээд байна. Энэхүү виза нь 5 сая австрали доллараас дээш хөрөнгийг засгийн газрын бонд, хөрөнгө оруулалтын санд оруулсан хүнд олгогдох юм. Ингэснээр тухайн хүн 4 жил хүртэл Австралид оршин суух, улмаар байнгын оршин суух  (Америкийнхаар бол ногоон карт) эрхтэй болно. Иймэрхүү ижил төстэй виза-ний системээ Канад 6 сарын өмнөөс түдгэлзүүлснээс Хятад  болон гадны хөрөнгө оруулагч нар Австралийг ихээхэн сонирхох болсон юм. Урьд нь мэргэжлийн боловсон хүчинд олгодог байсан байнгын оршин суугчийн виза-нээс ялгаатай нь насны хязгаарлалт, англи хэлний шаардлага тавихгүйгээрээ хөрөнгө оруулагч нарт таатай нөхцөлүүд бүрдүүлжээ.

 Хэдийгээр одоогийн байдлаар энэхүү виза хэн нэгэнд олгогдож амжаагүй  байгаа ч гэсэн 140-д хөрөнгө оруулагч нар Австралийн цагаачлалын албанд сонирхож буйгаа албан ёсоор илэрхийлжээ.

%d bloggers like this: